معلش أنا حلمى طويل شوية فيا ريت ما تملوش منه عارفين نفسى أروح المدرسة الصبح على جدول مقتنعة به ما يكونش بره تخصصى نفسى المدرسة توفر لنا كتب فى التخصص وتعمل حصة لكل مدرس ملزم فيها بالقراءة فى المكتبة وما حدش يقول لى عندك الكمبيوتر الكتاب يمنح قارئه بالإضافة للمعلومة راحة نفسية وهدوء ويعلمه الصبر (ده معناه أن أخصائية المكتبة حتشتغل زيادة كده ادينى اتكلمت فى السياسة أسفة)وبعد كده يقوم المعلم بعمل بحث فى ما قرأه لنعلم أوجه الإستفادة مما قرأ
نفسى نعرف ميول كل مدرس خارج العمل ونحاول نستفيد منه ونوجهه
نفسى أعمل حضانة لأولادنا وأولاد البيئة المحيطة وتكون على أعلى مستوى من التربية ونتاج هذه الحضانه يكونوا هم تلاميذ الصف الأول عندنا
نفسى أعمل وجبات قيمة للمدرسين والتلاميذ نفسى المدرسة وهى خارجة من المدرسة يكون معاها احتياجات بيتها اليومية مثل الخضار والفاكهة
نفسى يكون عندنا قطعة أرض خاصة بالمدرسة يزرعها الأولاد بالتعاون مع مدرسى الزراعةوتعرض منتجاتها للبيئة
معظم كلامى منصب على المدرس هذا بالإضافة لكلام زملائى السابق وأنا على يقين تام أن نجاح العملية التعليمية يتوقف على المعلم ليس على الطالب وعلشان نوصل للمدرسة الحلم لازم نحقق حلم المدرس ولا إيه رأيكم ولسه فيه للحلم بقية
